هيك منصير وطن … \ لارا سليمان نون
منصير وطن:
– لما نبطِّل كلنا مدراء…
– ولما نعلّم ولادنا إنو الكهربجي والسنكري مهمين وبيطلعوا مصاري أكتر من كتير مهَن مليانة برستيج…
– لما ما نستحي نحكي ولادنا عربي، لأنو العربي مش كلاس …
– لما يصير في ناس بتعزف موسيقى عالطرقات…
– لما الكتاب يصير بأهمية جزدان الشانيل… وماركات الزفت يلّي عِميولنا قلوبنا…
– لما ينقرضوا الفاشينيستا ويريحونا من هبَلُن…
– لما الفن والرقص والنحت والرياضة بيتفوقوا عظاهرة الشفاف والمناخير والأضافير المترين والشباب المسدسين والمربعين والمعترين عصعيد الطابق الفوقاني…
– لما منتعلم بالمدارس نحب حالنا ونحترم طاقاتنا حتى لو جبنا صفر…
– لما منحفظ التاريخ يلي بيخبرنا عن الثورات الإنسانية مش عن معارك مش معروف فيها مين عميل ومين عامل ومين معمول به…
– لما بيسألوا ولادنا بالامتحان الرسمي شو عِملت الأم تريزا لما إجت علبنان؟ وشو الخطوة التاريخية يلي عملها الإمام المغيب موسى الصدر… مش بيسألوهن أسئلة مرتبطة بأحداث أكلها الصدي…
– لما يخف الجوع النفسي… جوع الوصولية… جوع محو الآخر تنبيّن نحنا… لأنو الجوع الجسدي جوع حقيقي بس مليان كرامة…
– لما الآدمي ما بينعتوه بالأهبل… وابن البيت بالمعتّر…
بعتقد… هيك… يمكن يصير في وطن…