كتبت الإعلامية لارا سليمان نون:
نِدوّر عَالحب…
ومِننسى الغريب يلّي ابتسمِلنا من دون سبب…
ولقمة الخبز يلّي منلمّا من الأرض ومنبوسها…
مننسى الولد يلّي ركض صوبنا وغمرنا من دون ما نكون حاملين لعبة…
والختيار يلّي عم يدعيلنا عَ الرايح والجايي…
والدكّنجي يلّي كل ما نزورو بيقول: “الله يرزقك”…
مننسى الصلاة يلّي منصلّيها كل ما نشوف سيارة إسعاف…
مننسى الوردة يلّي تفتّحت نهار زعلنا… وعناق غريب رجّعلنا الدم بعروقنا…
مننسى الناس يلّي اسمنا بصلاتن… والخير يلّي زارعينو بهالدني…
مننسى إنو وقفنا حد ناس عالسكت… وربنا عالسكت رح يرزقنا…
نِدوّر عَالحب… والحبّ يلّي فينا مخزون أعظم وأرقى وأهمّ من كل مشتقّات الحب “المنتهية الصلاحيّة”.