المهم “ياسمينا زيتون”…
كتبت لارا سليمان نون :
المهم “ياسمينا زيتون”…
لما يسألوكي عن “الزيتون”… خبريهن عن جنوب لبنان… وشجر الزيتون…
خبريهن عن المواسم… والعيلة يلي بتجتمع بالبساتين والولاد يلي بيلعبوا عالطاحون…
خبريهن عن أرض… على قد ما فيها خيرات… فيها جمال ومضمون…
ومتل ما كل شي اسمو “جمال” بيتحارب… هيك هالأرض بتتحارب… وعليها العيون…
ولما يسألوا عن “الياسمينا”… خبريهن عن شجرة الياسمين يلي بتضحك كل ما طل حدا… وبتحمل ريحة غامرة فيها ذكريات كل يلي فلو… وكل يلي ضلو… خبريهن عن بِكلة هاك البنت لما كانت بالمدرسة… وعن ريحة الصبية بس شقشق جمالها بالصبا… خبريهن عن ياسمينة الحب… يلّي طمعوا فيها… وبدن “يقصفوها… يغتالوها… يمحوها”…
خبريهن انو ضريبة جمال الياسمين وعتق الزيتون… كبيرة… بس على قد ما هيي كبيرة على قد ما الله كبير… وهون خبريهن عن الله…
خبريهن عن بلد الناس بعدا واقفة فيه عإجريها لأنو في الله… وإذا ركعوا شي نهار… ما بيركعوا غير ل الله…
مبروك “ياسمينة” لبنان…
تابع ZNN على تيليغرام
احصل على آخر الأخبار فور حدوثها.