اللهم إني صائمة وكل قطايف وأنتم طيبين / هبة عبد العزيز

اللهم إني صائمة وكل قطايف وأنتم طيبين

-تعالى لما أقولك حاجة من قلب المقلب … أجور النجوم ياسيدى في برنامج رامز جلال ( السقا ٣ مليون – مي عمر مليون ونص – باسم سمرة مليون و٢٠٠ الف – شيرين رضا مليون ونص – حمادة هلال ٢ مليون) ،،،، 
إيه ده ياجدعان!!! شوية شوية علينا يا شيخ!!! آماااااال لو ماكانوش عارفين المقلب كانوا أخدوا كام!!

-قالو من جوه المدينة.. رجل الأعمال الكبير قرر زيادة الموظفين في القناة بتاعته أول ما جاله التليفون إياه ..
 

-قبل الفطار : حضرتك بكام الفانوس ده؟ ب ٣٠٠٠ جنية يا فندم ،،، لية حضرتك أنا عايزة فانوس بتاع وحوي ياوحوي مش فانوس لعرببتي المرسيدس!.

-خاص وعاجل.. القبض على ٣ مذيعات ماعملوش بودكاست لغاية دلوقتي !! افهموا الشغلانة في عرض النبي هو مش تقليد وخلاص!!.

-الحضارة وما أدراك ما الحضارة….
لما اتسألت ” مارجريت ميد ” عالمة الأنثروبولوجيا عن أول علامة للحضارة في تاريخ الإنسان ، فتوقع الجميع أن تحدثهم  عن الأواني الفخارية مثلا أو أدوات الصيد ،،،
لكن “ميد” قالت :”إن أول علامة  فىالثقافة القديمة عبارة عن عظام  لشخص أصيب بكسر في عظم الفخذ وشفي منه وأستمر في الحياة….
وشرحت :إذا اتكسرت رجلك لا قدر الله ، فغالبا هتموت لأنك لن تتمكن من الهروب من الخطر اللى حواليك ، كما لن تتمكن من الذهاب إلى النهر لشرب الماء أو البحث عن الطعام ، و زيادة على ذلك ستصبح فريسة سهلة للحيوانات المفترسة، ففي الغابة لا ينجو أي حيوان كسرت ساقه، لعدم توفر الوقت لغاية شفاء العظم…
وختمت الست “ميد” قائلة :
إن عظم الفخذ المكسور اللى تم معالجته ده دليل على أن شخصًا ما آخر استغرق وقتًا للبقاء مع المصاب و حمياته والإعتناء به حتى يتعافى…
وده معناه إيه يا حلوين : 
إن مساعدة (شخص ما) على تجاوز مصاعب الحياة هي نقطة البداية للحضارة ، يعنى الحضارة مساعدة مجتمعية … مممممم ما تيجوا نستحضر المعنى ده وخصوصا واحنا فى شهر كريم وكله خير  

ساعدوا بعض باللى تقدروا عليه.

-سلى صيامك … 
بيقولك من طرائف العقاد ،،،
كان فيه “متسول” كل يوم تقريبا بيستنى كاتبنا القدير ” محمود عباس العقاد” فى الطريق، وكان المتسول ده بيحاول بيتفنن فى كل يوم بشكل مختلف فى طريقة طلبه للصدقه ووجوب الحسنة وكده،   وإعتاد كاتنبا إنه ( يديله اللى فيه النصيب ) ، وفى مرة من المرات ياسادة يا كرام ؛  حصل إن أستاذنا العظيم غير طريقه وغاب كده كام يوم عن نظر “المتسول” إياه،،، وأول ما  شافه بعد المدة ديه طلع له نفس المبلغ اليومى المعتاد … قام المتسول قاله : يا استاذ إنت عليك ٦ أيام وده شهر رجب الحرام ،،،
قام “العقاد” خدها من قصرها وأعطى له المبلغ اللى طلبه وبالفوايد كمان ،،، وسأله الاستاذ بلغته الراقية  : ترى هل تحل الفائدة فى شرعك على الأيام الحرام ؟!
فرد المتسول ردا فى منتهى البلاغة على عملاق الأدب العربى قائلا:
(يمحق الله الربى ويربى الصدقات)
فكانت مفاجأة مضحكة جدا للعابس الظريف الذى كاد يموت من الضحك فى صدقه لولا لطف الله.
والله يرحم زمن الشحاته الجميل

-التلوث البصرى والسمعى اللى بيتقدم فى البرنامج اللى المذيعة إياها بتاكل عيش منه على حساب فضايح الفنانيين … ده اسمه عيب وحرام يا سعادة البيه والمصحف الشريف وخصوصا فى الشهر الفضيل ، ولا يمت للميثاق الأعلامى بأى “عرف”،،،،،الله يمسي الأستاذة “منى الحسينى” بالخير وجميع القائمين على برنامج “حوار صريح جدا”. 
وإن خوفت ماتقولشى وإن قولت ماتخافشى

وشوف كنا فين !!!!؟؟؟؟ وبقينا فين!!!!!!!!!؟؟؟؟؟يا عزيزى المشاهد بقى بقى .

-فيه ٣ خطفوا الكاميرا فى رمضان السنة ديه خطف :
– السيد أسامه الشهير ب ميكا فى مسلسل ( خالد نور وولده نور خالد) 
– كزبرة فى مسلسل ( كوبرا) 
– ⁠مصطفى أبوسريع فى مسلسل (العتاولة) صاحب افيه ( المال الحلال أهوه ) 
مواهب حقيقة ،  كانت مستنية (الفرصة) 
أتمنى من السادة القائمين على الأعمال الفنية يوظفوا الموهبة والقبول والكاريزما اللى بيتمتع بيها هؤلاء الثلاثة واللى ظهرت بشكل لافت الموسم ده بطريقة مفيدة للمجتمع والناس.

-من قلب الرياض.. بعد النجاح المبهر لنهائي كأس مصر في السعودية طلب المسؤلين في المملكة عن إستضافة مباراة القمة بين الأهلي والزمالك مقابل حفنة دولارات.. وكان جواب رابطة الأندية بصوت باسم سمرة : ” يلا بينا”.

-صباح الخير من العاصمة.. تحدثت في قناة أون تايم عن المدينة الأولمبية في العاصمة الإدارية الجديدة وتوقعت النجاح .. واليوم نشاهد إستاد عالمي وبطولة كبيرة بتنظيم مصري جيد ،،، شابوه لكل من فكر وأبدع وقرر وشكرا على التنظيم المتميز بجد.

-بمناسبة حملة نزول الأسعار اللي منتشرة على السوشيال ميديا بس .. بقول للسوبر ماركت الأسعار رخصت ع النت قالى أبقى إعملى لها download يا  فندم !

-النجمة الإسبانية “هبه عبوك” أخدت حقها من نجم باريس سان جيرمان “أشرف حكيمي”  ما قولتلك المحاكم الفرنسية مش بتهزر ، ومافيش”هبه” بتخسر أبدا.

-هو احنا لية بقالنا ١٥ سنة مافيش بربع جنية إبتكار في برامج المقالب؟! كلها لازم تكون ضرب وصراخ وعياط مكشوفة جدا، الله يرحم القدير إبراهيم نصر كان عنده بدل الفكرة ١٠ وبميزانية ١ ٪ من اللي موجودة دلوقتي .

-تخاريف صيام .. الفنانة المغربية “بسمة بوسيل” قالت في تصريح رمضاني كده، و مش عارفة ده كان قبل الفطار ولا بعده الحقيقة !!! المهم قالت ياسيدى إن مسألة رجوعي لتامر حسني حلم وهيتحقق.. عايزة تعملي معاه كليب قصدك يعني !!!

والقطايف اللي جاية هتبقى بعد العيد بإذن الله نتكلم فيها براحتنا أكتر و اللهم إنى صائمة وكل قطايف وأنتم طيبين.