صرخة إعلامية لبنانية… لارا سليمان نون : لأ مش كل شيعي يساوي تهديد…
اكيد حديثي ما رح يعجب كتار…
بس لأ يا جماعة… مش كل الناس بدا حرب… ومش كل الناس عندن ثقافة الموت…
لأ مش كل شيعي يساوي تهديد…
ولا الناس يلي عم تخسر ولادها وارزاقها لازم ينشمت فيهن…
مش كل بيت عم ينقصف… فيه سلاح…
ومش كل نازح اختار قدر النزوح…
مش كل حجاب يعني جايي الصاروخ…
مش كل مسلم رح ينتقم منكن بعد الحرب…
المهجّر مش شحاد… مش ابن شارع… مش بلا علم وبلا فهم…
مش كل بقعة او مستشفى عم تنقصف في تحتها فعلا نفق…
يا عالم… اسرائيل عدو… والاجرام ما الو حدود… ما تعمموا… ما تنساقوا بخطاب الكراهية…
انا بشهد على ناس من أحلى الخواجات استشهدوا بهالحرب وهني ما إلن بالموضوع لا من قريب ولا من بعيد…
مدير المهنية بالمعيصرة قتل حالوا حتى يسجّل الاب مجدي العلاوي عندو بالمدرسة حتى يعطيه شهادة كرمال يفرفح قلب ابنو ماتيو يلّي انقتل… والمدير استشهد الاسبوع الماضي وهوّي عنجد “من خيرة الشباب”…
يا اولاد الله… يا اولاد المسيح… ارحموا واغفروا… وربنا هوي الديّان الأكبر…
نحنا بزمن بدو حب… بدو رحمة…
لأنو الحقد ما بيولد غير الحقد…
طبيعي نكون حكماء… بس الحكمة لا تلغي الرحمة…
اقبلوها مني بكل حب… ويا رب تضلوا بخير!
تابع ZNN على تيليغرام
احصل على آخر الأخبار فور حدوثها.