لارا سليمان نون تكتب لأماني بزي: “قدام وجعك بتخرس أوجاعنا… ورصيدك بالسما كبير”
النص بعد التدقيق:
كتبت الإعلامية لارا سليمان نون:
فتّحت عيوني عالساعة ٤ ونص صباحاً… وبلاقي هالأم الثكلى عاملتلي Follow…
فكّرت على رواق… جلّست قعدتي بالتخت… كأنو في هيبة كبيرة حضرت قدامي ولازم كون قدها…
لازم كون قد هيبة الوجع… قد هيبة الفقد… قد هيبة الصبر…
أماني بزي… يا أيتها الأم العظيمة… ما قدرت قدّملك بساعات الصباح الأولى غير صلاة الوردية يلّي منصلّيها نحنا المسيحية… طلبت من العذراء مريم يلّي حملت هالوجع… تحملك بقلبها… وتعطيكي الرجا…
أماني… قدّام وجعك بتخرس أوجاعنا… ومخاوفنا… بتخرس ليالينا الباردة… وامتعاضنا من تفاصيل الحياة الزائلة…
أنا يا أماني حدِّك… بالقلب، بالروح، بالكلمة، وبالصلاة… وكتبتلك إنّي حاضرة لأي شي بتطلبيه…
وبنتك… هالأميرة النايمة، حاملتا بصلّاتي متل ما بحمل ولادي…
بدي تفيقي على كلماتي… على دعاء الناس…
على همسات يمكن تبلسملك شظية من هالشظايا يلّي نخرت جسمك…
عم شوف صورك… صور العيلة المكتملة… والبيت والصالون والألعاب وقالب الـ gateau…
عم شوف كلمة “الحمدالله” يلي كنتي تكتبيها عكل صورك…
الحمدالله يا أماني… ألف الحمدالله…
صدقيني، رصيدك بالسما كبيرررررر…
ومن عيلة صغيرة، اقبلينا نكون عيلتك…
حتى اللقاء الأخير… هونيك بالسما… حيث لا وجع ولا أنين… ولا فراق!